02.05.04 Kurzfristig

Ok de Dackfinken sin goot toweeg in Karsten sien Kroog.

(hp) De Vize van denn Wangerooger Kröögervereen het körtens vertellt, he har an denn Börgermester schreven, de schall emm doch knasch vertelln, wo se de Wiesschiller för ehr Kröög denn nu opstellen kun'n. "Un schreben heb ik emm all in'n Oktober van't letzte Johr", secht he, "un een Bescheed is bit vör'n Daag nich koomen".
"Is doch sobiso abberdatschen Kroom", segg ik to emm, denn ik heb em ok in'n November för'n Johr schreben un um "kurzfristigen" Bescheed beten. Anter heb ik bitlang ok noch nich kreegen, aver bi lüttem ward mi kloor, wat dat mit de "behördliche Kurzfristigkeit" so op sick het.
Muttst du "kurzfristig" dien Afgaven berappen, dor kunn so'n "kurzfristig" sacht mol bannig kott sien, un kunn amenn ok bannig düer warrn, as du dat to lang strecken wullst, dor schreven se di dann ok bannig "kurzfristig". Warts du aver op`n Anter van't Amt, dor kunn so'n "kurzfristig" sik sacht mol'n lütt beten wat hintrecken. Ick glööv, de möten sik dor elkees Woort ok good överleggen un mit de düer betaalte Schicht ward dor op't Amt wiss nich schludrig ümgungen. Un op de Verlööf för die Wiesschiller tövt wi ja nu sacht anne tein Johr, dor kümmt dat nu wiss op een poor Johr ok nich an. We sünd ja no jung, wi köönt ok no'n beten langer luurn.

Een Schrieverling van den "Spiegel" het mol Lüüd von't Amt in Sweden frögt, op see dat mit de Bescheedbegehren van de Börgerslüüd denn so hollen dee as de Düütschen. Dor hebben de nur denn Kopp schüddelt un secht, se künn sick gor nich vörstellen, wo dat geihen schall, dat op Begehr van Börgerslüüd nie nich antert warrt. Se dein de Börgerslüüd op de stell trüch schreeben, seggt se, dat steiht demm wohl jichtenswo ok to, op de stell, jümmers "kurzfristig".
De ollen Sweden, de weet jüsterment wo dat geiht, un wat se ehrn Börgerslüüd nu mohl schullig sünd. Aver - nu extra na de Swedschen schrieven, dordemit man een Anter von't Amt kriggt, dat wör denn wohl dok'n lütt beten överdrieven.

Un - opp denn Weeg, wat secht de Annere? "Wenn de Wind nich weiht, steiht de Möhl sied still."

...blifft piesfull. Euer Küsi

.