17.04.2004 Hooger Besöök

Übersetzung

(hp) Dor hett he sik extra op den lang'n Törn van Hannover na Wangeroog möökt, de
niedersächsische Minister för Umweltschutz, Hans-Heinrich Sander van de CDU. Se hebben hier avers ok süchtig op em lurt. De Börgermester het sien allerbesten Annorak antrocken und de vant Gemeenderat hätten sik all fien makt mit Strick, witten Kragens un Respektskledaaschen. De van de schwatte Fraktion jumpen heel lurig van een been op dat annner, de van de roote Fraktion argern sik'n beten desterwegen, dat dat nich mihr eer Minister wär, de da no de Insel kamt. Groote Verwachtungen hebben se avers all tosommen, de Minister schall sik nämlich dorüm kümmern dat de fiefuntwintig Windmöhlen vör de Wangerooger Küst nich but ward. Dadevör hebben se op dat Wiesbree anner Promenaad den Köllner Dom opbackt, dormit de Minister ock plieren kunnt wo gresig dat utsehn dee wenn de Möhlen nipp un nau dorachter hin but ward.
De Minister het sick ornlich för den Henwies bedankt un was bannig beindrückt west van dat Wark, seggt aver, dat he an den Buplaan nix ännern wullt. Dor mött de Wangeroogers mit leven, seggt he, denn an de Windmöhlen hangen nagraad bannig veel Arbeitsplätz und se mötten versöken, of de Möhlen sik ok in't siede Water dreien de und nich nur in't deepe.
Uns Börgermeester seggt avers, dat dat nich sien mutt und dat he un de Insulaners all'ns doon wüllt, dat de Möhlen nie nich but wart.
Nu is he wedder aftrocken, de Minster, un ännert het sik doch nix und ward sik wohl ok nich veel an de Plaans van de Kerls van't Bremer Energie Kontor.
Is denn de heele Hopphei nu för umsünst west? Nee, nich direkt, en poor Arbeitsplätz warrn de Windmöhlen ock de Insel woll kösten. "Umschichtung" heet dat woll.
De wies Minister för't Grööne in Berlin, de weerte Herr Trittin seggt: "Wi möten alltohoop Oppers bringen vör use niege Energie Economie".
Küsi meent :"Wörum fangt se egentlich mit de Oppers nich ok mol bi sik sülms an?"

23.04.04
Kloor rut
(hp) Dor heff ik in mien Bericht van de Umweltminister doch een Fehler möökt, up denn mi een van de Inselfraktion nu blied op henwiesen hät. De Minister Sanders is nich van de CDU, de is van de Geelen, van de FDP. Dat is mi nu wohrhaftig scharneerlich un ik schaam mi ok bannig een av ...!

.... avers, - op denn weeg, weet een denn hüt noch van welke Partei een is ? De grooten Instraktors ännern eer Menen dochen meest wo de Wind van de Noordsee de Kehr. Wo se güstern noch för strieden hebt, dat kunn an'n morgigen Dag all wedder heel anners ween, da sall een ok schon mal dür'nanner koomen.
Avers, wat wohr is, dat mut ok wohr blieven, de Kerl is van de FDP, dor bit de Müüs keen Faam van aff.

...blifft piesfull. Euer Küsi

.